Məntiq və əyləncə

İbtidai siniflərdə riyaziyyat fənninin tədrisi çox mühüm bir prosesdir. Kiçik yaşlı uşaqlara bu fənni sevdirmək üçün tədrisə bir qədər əyləncə, düşündürücü mahiyyətli məsələlər əlavə etmək, rəgarənglik yaratmaq, uşaqlarda bu fənnə marağı daha da artırar. Bu tip məsələlər uşaqlarda maraq yaratmaqla bərabər, onların məntiqi inkişafını da artırmış olur, bir növ uşağı düşünməyə vadar edir. Uşaqlar bizim gələcəyimizdir, biz bloqda onların da maraq dairəsini nəzərə alacaq və biliklərini artırmaq üçün məlumatlar yerləşdirəcəyik.

Elə isə, gəlin birlikdə düşünək…

1. Orxan nənəsindən 57 yaş kiçikdir. Anası isə Orxandan 22 yaş böyükdür. Orxanın indi 8 yaşı var. Nənəsi onun anasından neçə yaş böyükdür?

2. 9 litrlik bidon və 5 litrlik vedrənin köməyi ilə çəlləkdən vedrəyə 3 litr suyu necə tökmək olar?

3. Dolu qabla birlikdə balın kütləsi 10 kq-dır. Balın dörddə birini götürdükdən sonra qalan bal qabla birlikdə 8 kq oldu. Əvvəlcə qabda neçə kq bal var idi?

4. Sinfin 25 şagirdindən 17-si alman, 15-i isə fransız dilini öyrənir. Neçə şagird hər iki dili öyrənir?

5. İlbiz hündürlüyü 10 m olan ağac boyunca sürünür. Gün ərzində o 5 m yuxarı qalxır, gecə 4 m aşağı düşür. O neçə günə ağacın başına çatar?