Xocalı çəkilməyən acımızdır…

Xocalı torpağımızın ən qədim yaşayış məskənlərindən biridir. Tarixi mənbələr burada hələ 2.500- 3.000 il əvvəl adamların yurd saldığını xəbər verir. Xocalı Ağdam – Əsgəran-Xankəndi- Şuşa magistral yolunun üstündə, başqa sözlə desək, strateji cəhətdən olduqca vacib yerdə salınmışdır. Qarabağın dağlıq hissəsində yeganə aeroport lap yaxınlıqda idi. Kənd sakinləri əsasən südçülük-tərəvəzçilik sovxozunda çalışırdılar. Azğın düşmənlərimizin hücumundan sonra Qarabağın digər yaşayış məntəqələrində olduğu kimi, Xocalıda da həyat öz adi məcrasından çıxdı… 

Bizi bağışlayın, əziz balalar…

Müharibələr, tökülən qanlar, başımıza açılan müsibətlərin heç birindən günahsız olan uşaqların taleyi  yan keçmədi. Uşaqlar süngüyə keçirildi, iri boruların içinə doldurulub hər iki tərəfdən lehimləndi, min bir işgəncə ilə qətlə yetirildi. Heç uzağa gedib fikrinizi qarışdırmaq istəməzdim, iki onillik geriyə nəzər salsanız kifayət edər. Qarın üzərində donaraq qalmış, gözü çıxarılmış, üstündə min bir iyrəncilik edilmiş günahsız fidanlar…