“Şəki oması”

Əziz dostlar, nəhayət, söz verdiyim şirniyyatı təqdim etmək zamanı gəldi. Bilirik ki, Şəki Azərbaycanın qədim şəhərlərindən sayılır. Göz oxşayan mənzərəsi, təbiəti haqqında danışmaq yox, gedib görmək gərəkdir. Şəki deyən kimi ağıla gələn “Şəki Xan Sarayı”, “Şəki halvası”, “Piti”, “Şəki lətifələri” gəlməyə bilmir. İstərdim ki, bunların sırasına “Şəki oması”nı da əlavə edəsiniz. Bu şirniyyatı ilk dəfə bu yay Şəkidə olanda dadmışam. O zamandan bura da dadı damağımda qalıb. Sevimlimiz, Şəki gözəli Nübarın sayəsində əsl resepti əldə edən kimi bişirib sizinlə də paylaşmaq istədim. Niyə əsl resept deyirəm? Çünki internetdə bu şirniyyatın adı belə düzgün verilməyib deyə həmin reseptlərlə hazırlamaq istəmədim. Bişirdiyim resepti sizinlə də bölüşürəm və təklif edirəm ki, bu şirniyyatı mütləq və mütləq hazırlayıb dadına baxın.

Lazım olan ərzaqlar:

0,5 kq şəkər tozu

0,5 l qatıq

2 ədəd yumurtanın ağı (sarısı üzərinə)

125 qram kərə yağı

0,5 x/q soda

Bir çimdik duz

Yoğrulana qədər un

Darçın

Hil

Keşniş toxumu

Zəncəfil

Zəfəran

Muskat qozu

Sarıkök

Vanil (Ümumilikdə bir dolu xörək qaşığı ədviyyat qarışığı)

Üzəri üçün çörəkotu

Hazırlanması:

Yağ dağ olmamaq şərtiylə əridirik, şəkər tozu, qatıq, yumurtanın ağını əlavə edib çalırıq. Şəkər tozu əridikdən sonra sodanı bir az üzüm sirkəsində söndürüb əlavə edirik. Toz halında olmayan ədviyyatları qəhvəüyüdəndə üyüdürük, xəmir üçün hazırlanan kütləyə əlavə edirik. Sonra asta-asta un əlavə edib qarışdırırıq. Ələ yapışan yumşaq xəmir hazırlayırıq. 10-15 dəqiqə xəmiri dincə qoyuruq. Bu müddətdə sobanı yandırırıq ki, qızsın. Qənnadı təbəqəsinə yağlı kağız sərib xəmirdən bir kündəlik bura qoyuruq. Əlimizi yumurta sarısına batıraraq çox nazik olmamaq şərtiylə yayırıq. Üzərinə naxış vurub çörəkotu əlavə edirik sobaya bişməyə qoyuruq. Bişdikdən sonra soyudub dilimləyirik və süfrəyə təqdim edirik. Nuş olsun😘